Шпанскиот уметник Андони Бастарика стана популарен откако сподели фотографии од неговите уникатни дела на социјалните медиуми. Имено, тој прави бикови, ајкули и многу други животни од песок.
Бастарика за „Борд панда“ објаснува дека ова е негово хоби уште од 2010 година, кога на плажа направил скулптура на малата сирена. Наскоро сфатил дека има талент за вакви работи, па продолжил со посложени проекти.

Тој додава дека е фасциниран од песокот, но и дека е воодушевен од фактот дека зрната песок мора цврсто да се притиснат заедно за да се создаде такво уметничко дело. Тој смета дека ова важи и за луѓето, доколку тие се обединат доволно – можат да направат одлични работи.
Процесот на правење животно од песок оди вака: Бастарика собира големи количества влажен песок на едно место, а потоа полека го обликува и се обидува да ја направи првобитната форма.

Откако ќе ја направи формата, тој продолжува да ја заострува и да ја усовршува со стап додека не стигне до онаа форма што ќе изгледа реална. Тој често користи материјали како што се јаглен, камења, парчиња стакло…
– Процесот на правење зависи од големината на животното што го правам. На пример, направив слон за два дена, додека за коњ и за бизон се потребни по 12 часа работа. За помалите кучиња, пак, се потребни од шест до осум часа работа – објаснува уметникот.