Споменикот Стоунхенџ може да го изгуби статусот на светско културно наследство на УНЕСКО поради изградбата на тунел во непосредна близина, давајќи му статус на „наследство во опасност“, што претходи на целосно одземање на статусот на светско наследство.
Разгранокот за културното наследство на ООН им соопшти на британските министри дека овој неолитски споменик наскоро би можел да се најде на нивниот список со наследство „во опасност“ доколку изградбата на патниот тунел од 1,7 милијарда фунти продолжи како што е планирано.
Официјалните претставници за светското наследство изјавија дека УНЕСКО ќе стави „поостар фокус“ на другите 31 локалитет на списокот на Велика Британија, вклучувајќи ги палатата „Вестминстер“ и градините „Кју“, откако Ливерпул стана дури третото место за речиси 50 години на кое му беше одземен статусот на светско наследство. Меѓу локациите што се очекува да бидат под надзор на УНЕСКО се наоѓаат Стоунхенџ, Единбург, Лондонската кула и историската рударска област во Корнвол.
Крис Бленфорд, претседател на Светското наследство во Велика Британија, се пожали дека постои „ниско ниво на владина свест“ за важноста на местата на УНЕСКО, кои се рангирани заедно со светските чуда како Таџ Махал и пирамидите во Гиза.
– Овие се места од меѓународно значење. Тие се најдобри од најдобрите од нашето културно наследство. Во време кога сме надвор од ЕУ и сакаме да бидеме сериозно сфатени на меѓународно ниво, зошто да не го искористите ова неверојатно наследство од толкаво значење за да си помогнеме – рече Бленфорд.
На Стоунхенџ се очекува да му биде одземен статусот доколку тунелот биде изграден на локацијата каде што е планирано. Секретарот за транспорт Грант Шапс во ноември минатата година даде зелено светло за шемата, и покрај предупредувањата на УНЕСКО дека тоа ќе има негативно влијание врз историската вредност на областа.
