Само пет месеци по поставувањето во земјината орбита, телескопот на НАСА – ТЕСС – кој е во потрага по нови светови вон нашиот Сончев систем, откри две оддалечени планети. Ова е првото откритие на сателитот, соопштуваат официјални лица.

Планетите класифицирани како „супер Земја˝ и „жешка Земја“, се наоѓаат најмалку 49 светлосни години оддалечени од Земјата. Д-р Сара Сигер смета дека вселенските тела се премногу топли за на нив да има живот, но исто така додава дека се очекуваат уште повеќе интересни сознанија.

– Мора да почекаме да видиме што уште ТЕСС ќе открие. Знаеме дека планети има, и дека се „расфрлани по небото“ и само чекаат да ги пронајдеме – изјави Сигер.

Мисијата ќе трае две години и ќе чини 337 милиони долари. Сателитот досега идентификуваше и 73 ѕвезди околу коишто можеби кружат планети на кои би можело да се развие живот.