Продуцентот на популарната серија „Големи мали лаги“, Дејвид Е Кели, подготви нов телевизиски проект со Никол Кидман и со Хју Грант во главните улоги. Ова фантастично дуо е дел од драматична приказна за мистериозни сопружници.
Кели вели дека Кидман и Грант носат бесконечна забава на малите екрани во мини-серијалот наречен „Слом“, чие дејство се базира на мноштво тајни меѓу нив, но исто така вклучува и злосторство што открива вознемирувачки вистини.
Приказната се одвива во светот на елеганцијата и луксузот на Менхетн. Кидман ја игра Грејс, успешна терапевтка што лекува парови, додека Грант се наоѓа во улогата на нејзиниот сопруг Џонатан, кој е детски онколог.
– Животот на успешна терапевтка во Њујорк започнува да се расплетува пред објавувањето на нејзината прва книга – се вели во описот на серијата.
Сите шест епизоди од оваа мини-серија ги режираше Сузан Биер. Таа го внела својот прецизен и напнат наратив во серијата, пишува „Би-би-си“.
Првата епизода на „Слом“ ќе биде премиерно прикажана на 25 октомври на „Ејч-би-о“.
