Продуцентите Стојче Ѓорѓиев, Марјан Алексовски и Жарко Стојаноски и режисерот на „Светот на Биби“, Гоце Цветановски

Со највисоки оцени беше оценета презентацијата на „Светот на Биби“ на Саемот на цртани филмови што се одржа вчера во Тулуз, Франција.

По сите категории по кои проектите се оценуваат на големиот Картун-форум, кој собира илјадници учесници, проектот „Светот на Биби“ ги доби највисоките оцени (5).
Претставници на големи продукциски студија присуствуваа на презентацијата на која се обратија продуцентите Стојче Ѓорѓиев, Марјан Алексовски и Жарко Стојаноски, како и режисерот на „Светот на Биби“, Гоце Цветановски.

Меѓу гостите беа претставници на „Би-би-си чилдрен“, „Дизни ченлс ворлдвајд“, „Хепи фемили ентртејмнт“, „Киду“, „Монстер ентртејмнт“, „Викиндс“, „Студио 100 медиа“, „Дрим воркс анимејшн телевижн“, „ТВ5 Монд“, од Францускиот национален центар за кинематографија и анимација, Холандскиот филмски центар, Чешката телевизија и многу други.
– Многу сме среќни што имавме публика која беше одушевена од презентацијата, особено од тоа што сè е направено за кратко време во рамките на проектот. Добивме највисоки оцени и одлични коментари – велат од тимот на „Светот на Биби“.