Холивудскиот глумец Мел Гибсон нема да ја повтори улогата во долгоочекуваното продолжение на „Пилешка трка“ на „Нетфликс“, открија извори блиски до продукцијата „Д врап“.
Одлуката дојде откако Винона Рајдер неодамна го обвини Гибсон за антисемитска навреда кон неа за време на холивудска забава во 1995 година, како и реакциите и повиците за негова смена, кои веднаш потоа ги преплавија социјалните мрежи.
Во е-пошта испратена до „Њујорк пост“, добитникот на „оскар“ за режија ги негираше тврдењата на Рајдер дека тој ја навредил кога дознал дека е Еврејка.
– Ова е 100 проценти невистина – напиша Гибсон, тврдејќи дека Рајдер лажела и во колумна за магазинот „Џи кју“ во 2010 година кога таа првпат го спомнала наводниот инцидент.
Рајдер тврди дека на забава во Холивуд во 1995 година, кога се разговарало на тема еврејски народ, ѕвездата на „Лудиот Макс“ ѝ дофрлил навредлив термин што асоцирал на Евреин, кој избегнал палење во нацистички камп на смртта, пишува „Њујорк пост“.
