Беше ветено да се молчи цели четириесет години – од смртта на Тито до мај 2020 година. Конечно дојде време да се открие последната исповед на Тито, раскажана, верувале или не, на еден млад човек од Македонија. Лекарот Филип Ристовски на смртната постела на Тито слушна многу нешта што се криеја од јавноста и за кои беше забрането да се зборува, тајни што никој ги немаше чуено, закопани длабоко во душата на еден од најголемите државници на сите времиња.
Во книгата „Тито, мојот претпоследен херој“ на Зоран Спасов-Ѕоф, која ја издаде „Арс ламина“, на повеќе од двесте страници се раскажани приказни од кои се смрзнува крвта, докази за мрачната страна на Тито, но и за неговата големина што ќе го надживее илјадници години. Ова е исповед за сите негови венчани и невенчани жени, за македонското прашање и седумте сценарија по кои ние никогаш не би имале држава, за неговата најголема љубов што ја закопал во својот двор, за егејското прашање, за тоа кој ја уништи идејата Македонија да излегува на Црно и Егејско Море, за религијата, за сите свои грешки и покајанија, за тоа како ги „превесла“ Черчил и Сталин… Ова е само вовед за новиот роман што поместува многу граници – историски, љубовни, воени, морални, маалски, одмазднички.
Средствата од авторските права и од продажбата на книгата ќе бидат наменети за „СОС детско село“ – Македонија.
