Деновиве е објавен финалниот трејлер за урнебесната комедија „Читателски клуб“, која на едно место ги собра актерските ѕвезди: Дајан Китон, Кендис Берген, Џејн Фонда, Мери Стенбурген, Енди Гарсија, Креиг Т. Нелсон, Дон Џонсон, Алиша Силверстон и Ричард Драјфус.
Филмското остварување на режисерот и сценарист Бил Холдерман ни ја донесува приказната за четирите пријателки од детството што живеат во Калифорнија и го откриваат и го читаат романот „Педесет нијанси сиво“ во својот клуб на љубители на книгата.
Дејството на комедијата ќе се разгори кога успешните и интелигентни Дајан, Вивијан, Шенон и Керол ќе почнат да го менуваат својот љубовен живот по читањето на оваа литература, на која, инаку, не се навикнати.
Филмот „Читателски клуб“ е првенец на Холдерман. Тој досега беше познат само како продуцент и писател. Оваа комедија во киносалите ќе пристигне на 18 мај.
