Во Лондон е осуден човекот што уништи слика од Пабло Пикасо вредна 20 милиони фунти, која беше изложена во галеријата „Тејт модерн“, јавува Би-би-си.
Шакил Масеј (20) призна дека на 28 декември минатата година ја уништил сликата од 1944 година. Поправката на сликата, како што рекоа експертите за време на судењето, ќе трае до 18 месеци и ќе чини до 35 илјади фунти.
Масеј е осуден на 18 месеци затвор поради уништувањето на сликата. Неколкупати ја удрил сликата со катанец, а потоа ја симнал од ѕидот и ја фрлил на подот.
За време на изрекувањето на казната, судијата рече дека постапката на Масеј била само обид да ги добие своите пет минути слава. Кога полицијата го уапсила, Масеј рекол дека станува збор за перформанс.
Уништеното дело ја прикажува љубовницата на Пикасо, Дора Мар, а е создадено во мај 1944 година во Париз во последните месеци од нацистичката окупација. Тоа е во приватна сопственост и е на заем во галеријата „Тејт модерн“ од 2011 година.
