Главниот град на Нов Зеланд, Велингтон, стана град со многу невообичаено место – продавница каде што сè е бесплатно.
Оваа социјална продавница или банка за храна, како што се нарекува, е основана од градската организација „Мисија на Велингтон Сити“, која е основана во 1904 година за да одговори на барањата и потребите на локалното население. Нивната цел, меѓу другите, е да изградат заедница заснована на грижа за другите.
Идејата за основање на ваква продавница произлезе од потребата за поддршка на заедницата преку обезбедување пристап до храна кон луѓето и можност да изберат што сакаат. Исто така, се планира проширување на мрежата на вакви продавници во наредниот период.
За да се реализира можноста за купување тука, сите заинтересирани треба да контактираат со организацијата, за да објаснат во каква ситуација се наоѓаат и зошто им е потребен ваков вид помош. Потоа тие закажуваат состанок кога ќе можат да одат на шопинг. Наместо цени, предметите во продавницата се обележани со поени од еден до пет, каде што еден поен вреди за најевтините намирници, додека пет поени вредат намирници во вредност од повеќе од 10 долари. Во зависност од ситуацијата во која се наоѓа лицето, организацијата одлучува колку поени за набавката ќе му бидат доделени. На пример, возрасно лице што не е во брачен статус би добило околу 55 поени, додека едно семејството би добило значително повеќе. На овој начин, социјално загрозените лица не добиваат готов пакет храна, туку сами одлучуваат што да купат и како да управуваат со својот буџет. Веќе има околу 3.000 производи во продавницата и може да се најде сè, освен алкохол и цигари. Социјалната продавница има поддршка од големи синџири на супермаркети, но донациите се секогаш добредојдени.
