Казнувањето со удари со стап поради прекршување на Шеријатскиот закон веќе нема да се изведува на јавни места во конзервативната индонезиска провинција Ацех, соопшти гувернерот на областа, Ирванди Јусуф.

Неофицијално, ваквата одлука е резултат на меѓународната осуда на тепањето на двајца мажи лани поради тоа што биле во хомосексуална врска, што, според оценките на индонезиските власти, „го загрозило имиџот на Индонезија“.

Новите правила се утврдени со меморандумот за разбирање што го потпишаа гувернерот на Ацех и шефот на регионалната Канцеларија за човекови права, со кој се предвидува казнувањето со удари со стап да се врши исклучиво во казнено-поправните установи.

Според документот, граѓаните и натаму ќе можат да го гледаат тепањето, но снимањето е забрането.

Последен пат јавното тепање со стап во Ацех е извршено на 27 февруари.

Ацех е единствена провинција во Индонезија, што го практикува Шеријатскиот закон, откако централната Влада направи отстапки во 2001 година, при напорите да се стави крај на повеќегодишната војна за независност на регионот.