Познатиот македонски музичар и кантавтор Благој Маротов денеска на јавноста ќе ѝ ја претстави својата нова песна „Роман за нас” за која е снимен и спот. Но тоа не е случајно бидејќи токму на овој ден, Хрватска и Балканот ќе му оддадат почит на легендарниот пејач Оливер Драгојевиќ, кој замина во вечноста пред две години, на кого Мартов му ја посвети „Роман за нас“. Промоцијата е поддржана и од Заедницата на Хрватите во Македонија. Песната можете да ја слушнете на следниот линк.
 
Познатиот македонски уметник со голем пиетет се навраќа на топлите спомени што го поврзуваат со идолот на многу генерации, а воедно и открива што го поттикнало да ја напише песната.
 
– „Роман за нас“ како да се напиша самата, едноставно бликна од мене. Композицијата ја напишав за нашите патувања со мојата сопатничка Јуле, за нашите настапи, свирки, дружби по хрватското приморје, каде речиси секоја година, за жал освен оваа, бевме редовни гости. Прво јас настапував со мои колеги по места како Цавтат, Сребрено, па горе Порторож, а последните две години со Јуле бевме гости баш во Вела Лука, родното место на Оливер Драгоевиќ, каде имав контакти со негови блиски луѓе и роднини. Минатото лето запознавајќи се со музичари од Вела Лука имавме и еден настап во местото Блато на Корчула, па така таа врска со Далмација стана уште посилна. Имав и планови за настап на познатиот „Сплитски фестивал“ годинава, но од познати причини не дојде до тоа. Мојата „карантинската слобода“ ја исористив  да напишам песна на шармантниот далматински дијалект, која му ја посветив на големиот музичар и пријател Оливер Драгоевиќ – вели Благој Маротов.
 
Тој дополни дека оваа песна, во текстот го има и зборот галеб, како симбол и асоцијација на една од најубавите песни на Оливер.  Маротов се потсети и на вечерта која го споила за сите времиња со Драгоевиќ. 
 
– Пред 10 години имавме една незаборавна вечер во Скопје, во која буквално се натсвирувавме, натпејувавме, заедно со Петар Грашо, Маја Оџаклиевска, мојата Јуле и синот Бојан. Оливер дојде по концертот во Скопје, во ресторанот „Камник“, секогаш расположен за убава свирка. Кога ја слушна мојата тогашна верзија на „Магдалена“, снимена во соработка со Живоин Глишиќ и тапанарот Менду Деар-Мече на македонски,  рече: „Кој  го направил ова толку добро?“  И само што почнав да ја интерпретирам мојата верзија на „Магдалена“, не  дојдов ни до рефренот, Оливер скокна и само праша од кој тоналитет ја пеам и седна на клавиновата. Неговите пријатели кажуваат дека ретко пеел на такви седенки, толку расположен. Инаку, „Роман за нас“, снимена во моето домашно студио, е романтична љубовна тема во медитерански мелос, за која изработивме и видео спот со мојот тим –  вели авторот. 
 
Денеска, додека во Вела Лука, во Хрватска и во целиот регион ќе се пеат песните во чест на Оливер и во Македонија ќе одекнуваа оваа песна. Промотивно ќе може да се слушне на радио „Буба Мара“ и во пладневна емисија „Ритамот на денот“ на Македонско радио, а видеоприказната ќе биде прикажана на македонските телевизии. 
 
– Се надевам дека песната ќе допре до срцата на неговите најблиски и до семејството,
но и до публиката во регионот – додава Маротов.
 
Благој Маротов по успешната кариера во својата земја, на балканската публика ѝ стана познат по настапот во регионалното музичко шоу „Никогаш не е доцна“, каде учествуваше и неговата сопруга Јуле Мартов.
 
Инаку, за  македонска публика Маротов подготви  уште една убава летна мелодија, што ќе ја промовира на големиот национален  празник Илинден, во Крушево. М.Т.