Успешна првата проба на Тамара на евровизиската сцена

810

Во Тел Авив почнува да се чувствува евровизиската атмосфера. Градот се полни со илјадници евровизиски обожаватели, има околу 1.500 акредитирани новинари, пејачите од 41 земја-учесничка веќе ги направија првите проби, а се склопуваат и првите пријателства во евровизиското село

Нашата годинашна евровизиска претставничка, Тамара Тодевска, во Тел Авив, по успешната прва проба, дадените интервјуа за неколку евровизиски сајтови и за други медиуми, заедно со својот тим посветено се подготвува за втората проба, која ќе се одржи в петок.

– Тамара и сите во екипата сме во одлична форма. Сите чувствуваме позитивна енергија и посветени сме на настапот во полуфиналето на 16 мај и секој на свој начин се труди да го даде својот максимум. Им благодариме на сите за искрената поддршка и на добрите желби со кои нѐ испратија од Скопје. Втората проба е на 10 мај, а нѐ очекува и свеченото отворање на „Евровизија 2019“ и приемот кај градоначалникот на Тел Авив, Македонската вечер, настапот на Тамара во „Евроклубот“ со други евровизиски некогашни и сегашни учесници на 13 мај и, секако, многу средби, интервјуа, контакти со евровизиските обожаватели – ни рече Коста Петров, пиар на македонскиот евровизиски тим и автор на текстот на „Proud“, која го напиша заедно со сопругата Сања.

Во Тел Авив се и тројцата композитори на „Горда“ – Дарко Димитров, Роберт Билбилов и Лазара Цветковски, како и Јана Бурчевска, која пред три години беше дел од овој престижен фестивал.

– Во Тел Авив одлично се чувствувам, градот ми е некако близок. Едвај чекам на 16 мај да застанам на сцената на „Експо-центарот“ и да ги излеам сите емоции насобрани во мене. Драго ми е што во „Proud“ многу луѓе се пронајдоа, што толку емотивно ја доживуваат. Кај мене секоја изведба предизвикува ежење и секогаш сум на работ да заплачам. Таа не е само феминистичка песна, таа е за сите ранливи луѓе, кои и покрај сѐ решаваат да им се спротивстават на проблемите во животот – изјави Тамара за евровизискиот сајт „Вивиблог“.

Таа на сцената се појави во долг смарагднозелен фустан, креација на дизајнерот Александар Ношпал, кој исто како и Тамара има големо евровизиско искуство. Ја дизајнирал облеката на неколку наши претставници: девојките од групата „Икс-икс-ел“, Каролина Гочева и Тоше Проески.

– Иако имаше и позитивни и негативни коментари за моите досегашни креации, за нив сѐ уште се зборува и тие оставија голема трага, нивните фотографии постојано се појавуваат во медиумите, што значи дека не се заборавени, а тоа за мене како автор е најважно. Одлучив да соработувам со Тамара, пред сѐ затоа што сме многу блиски и сакав и јас да придонесам за успешното претставување на нашата земја на овој избор – вели Ношпал.

Пејачката навистина изгледаше многу впечатливо додека ја исполнуваше баладата „Proud“ на евровизиската сцена, додека на шесте огледала зад неа се отсликуваше нејзиниот лик. Придружните вокали: Антонија Гиговска, Александра Јанева и Васил Гарванлиев, овој пат само се слушаат и не се гледаат на бината.

Инаку деновиве во Тел Авив почнува да се чувствува евровизиската атмосфера.

Градот се полни со илјадници евровизиски обожаватели, има околу 1.500 акредитирани новинари, пејачите од 41 земја-учесничка веќе ги направија првите проби, а се склопуваат и првите пријателства во евровизиското село.

Меѓу водителите на фестивалот е и познатата израелска манекенка Бар Рафаели, а дел од годинашното издание се и некои од досегашните победници и учесници како: Верка Сердучка, Менс Зермерлов, Кончита Вурст, Линда Мартин, Шарлот Перели и многу други. Најавени се настап на ланската победничка Нета, која ја донесе „Евровизија“ во Израел, и промовирање на нејзина нова песна, свое мини-шоу ќе има и Дана Интернешенел, а за финалето е најавен настапот на поп-кралицата Мадона.
Според организаторите, сѐ е максимално безбедно, па и покрај некои закани за терористички напади, нема место за загриженост и за паника.