Само 30-минутен тренинг со тегови го регенерира организмот

157

Вежбањето дома може да биде многу ефикасно доколку тоа отсекогаш било ваш избор, но може да има и многу предизвици, а еден од нив е недостигот од опрема. Кога станува збор за опремата за вежбање, кај жените првиот избор се теговите. Со оглед на тоа дека тие варираат во однос на тежината од најлесни до екстремно тешки, јасно е дека може да се приспособат за секого, без оглед на полот, возраста, физичката кондиција или нивото на подготвеност, пишува „Хелтлајн“.
Меѓутоа, ако инвестирате можете да си создадете домашна вежбалница во која ќе уживате. Клучно за тоа е да си набавите неколку реквизити за вежбање како што е сет тегови, кои ќе ви помогнат да ги постигнете своите цели при вежбањето дома. Ако пребарате на Гугл или на Амазон ќе видите дека има голем избор на тегови.

Покрај тоа, вежбањето со тегови е многу едноставно, а можете да се консултирате и со личен тренер или со друг професионалец за вежбите што треба да ги правите со теговите. Само 30-минутен тренинг на ден може да донесе многу добар ефект врз вашето тело, од зголемување на силата, поголема потрошувачка на калории и подобро ментално и физичко здравје, до намален ризик од голем број болести, од кардиоваскуларни до респираторни заболувања, дијабетес, дебелина и многу други.
Теговите се лесни за употреба, а заземаат малку простор.

Со нив можете да вежбате апсолутно сè, само најбитно е да ја изберете вистинската тежина, да осмислите вежби и да си создадете рутина. Со нив можете да направите вежби за нозе, грб, гради, рамена, раце, стомачни, да го опфатите целото тело. Со зајакнување на мускулите, ќе постигнете цврсти и убаво обликувани раце. Тајната на успехот е во вежбањето на рамената, бицепсот и трицепсот барем еднаш до двапати неделно, за секоја мускулна група од три до четири вежби.