Росана по многу години се враќа на „Макфест“

771

„Макфест 2019“ ќе биде шарен во секоја смисла, од учеството на авторите, некои по долго време му се враќаат на фестивалот, до возраста на учесниците и секако звукот што ќе го донесе, а тоа, според мене, е и убавината на оваа манифестација, вели уметничкиот директор Владимир Дојчиновски

Триесет и четвртото издание на фестивалот на забавни мелодии „Макфест“, кое ќе се одржи на 10, 11 и 12 октомври во Штип ќе биде шаренолико и ќе понуди песни од разни музички правци, од класичен шлагер, поп-рефрени, рок-нумери, песни со етнопризвук, романси, електро-поп…, беше речено на вчерашната прес- конференција.
– Годинашниот „Макфест 2019“ навистина ќе биде шарен во секоја смисла, од учеството на авторите, некои по долго време му се враќаат на фестивалот, до возраста на учесниците и секако звукот што ќе го донесе, а тоа, според мене, е и убавината на оваа манифестација. На првата и на втората полуфинална вечер ќе бидат изведени по 15 композиции, а на финалето ќе ги слушнеме најдобрите 20 или 22 песни, за што сѐ уште не сме се договориле децидно со техничкиот директор Кирил Панајтов. Интересно е дека по многу години на макфестовската сцена се враќа Росана Сариќ-Тодоровска, а исто така по подолго време ќе го слушнеме и Дексо, еден од најдобрите вокали во земјава. Од странство, рамноправно за награда ќе се борат девојките од групата „Фрајле“ од Србија, кои ќе пеат на македонски јазик – рече Владимир Дојчиновски, кој годинава вторпат е уметнички директор на „Макфест“.

Меѓу авторите чии песни ќе ги слушнеме на фестивалската сцена во домот на културата „Ацо Шопов“ во Штип се и Григор Копров, Јован Јованов, Љупчо Мирковски, Баже Темелков, Весна Малинова, Ристо Самарџиев, Александар Масевски, Александар Ристовски-Принц и Александар Митевски, а по голема пауза меѓу композиторите се враќа и Тоше Поп Симонов.

– Годинава ни се враќаат дел од ланските дебитанти, но и дел од победничките имиња, како што се Мина Блажев и Наташа Малинкова, но среќен сум затоа што на фестивалот се враќаат и поранешни победници и реномирани имиња од македонската естрада. Годинава на фестивалот ќе ги имаме и Росана Сариќ-Тодоровска, Елена Петреска, се враќа и Александар Ристовски-Принц, имаме интересно дуо составено од Александар Митевски и актерот Драган Спасов-Дац. На фестивалот ќе настапат и пинковите ѕвезди Мартија Станојковиќ, Огнен Здравковски, Мартинијан Кириловски и Трајче Георгиев, потоа Игор Узунов, Барбара, Виктор Апостоловски, како и тројца штипски изведувачи – рече Дојчиновски.

На прес-конференцијата традиционално беше извршена и ждрепка за редоследот на изведувачите на првата и на втората фестивалска вечер. Фестивалот ќе го отвори Мартинијан Кирилов, долгогодишен учесник на „Макфест“, кој ќе пее песна на Ристо Самарџиев.

– Наградите се 5.000 евра за прво место, 3.000 евра за второ, и 1.000 евра за трето место, додека техничките награди се по 500 евра поединечно, за најдобар аранжман „Драган Ѓаконовски-Шпато“, најдобар дебитант, вокална интерпретација и сценски настап – напомена Кирил Панајотов, технички директор на „Макфест 2019“.