Многу вложуваш во трубата, ама и многу ти враќа

224

Бојан Митрески, трубач

Прилепчанецот Бојан Митрески уште од мал се интересирал за дувачките инструменти, но трубата му оставила силен впечаток пред сѐ заради тоа што му била поразлична и поспецифична од сите други инструменти. Токму затоа сe одлучил да ја изучува, иако е доста тежок инструмент. Завршил и ФМУ во Скопје и сега настапува на голем број концерти.

– Трубата е еден од потешките инструменти за свирење, но кога почнав професионално да се занимавам со неа, во текот на студирањето, сфатив што значи да си трубач и колку многу труд треба да се вложи. Инструментот бара макотрпна работа, посветеност и по неколку часа секојдневно вежбање. Но не се застанува тука, туку се посетуваат и различни школи и студии за труба. Многу е важно дишењето, техничките и тонски вежби и сѐ друго што е поврзано со трубата. Трубата бара премногу да вложиш, но и враќа. Професорот по труба ми велеше „ако го почитуваш инструментот, и тој ќе те почитува тебе“ – вели Митрески.

Ја избрал трубата за инструмент на кој ќе свири затоа што му била предизвик.
– Сакав да се соочам со проблематиката на инструментот. Успеав во тоа – додава Бојан.
Учествувал на многу мастер-класови кај врвни светски трубачи, а бил дел од повеќе меѓународни натпревари како во земјава така и во странство.

– Сум настапувал на повеќе концерти со повеќе оркестри, како што се симфонискиот оркестар и „Биг бендот“ при ФМУ, оркестарот на МОБ, со повеќе градски оркестри и различни камерни состави на повеќе манифестации и културни настани. Во моментов сум член на прилепскиот дувачки оркестар, битолскиот дувачки оркестар, камерниот состав „Квартет труби“ и др., со кои што настапуваме на различни манифестации каде што изведуваме програма од познати светски автори и од повеќе жанрови, како што се: класична музика, барок, парадна музика, популарна музика, како и преработки на блуз, џез и филмска музика – истакна Митрески.

Во иднина планира да продолжи да концертира и еден ден целото негово знаење што го стекнал да го пренесе на помладите генерации. Ка.М.