Кирил Џајковски го отвора „Скопје бир фест“

119

Од денеска до 15 септември на стадионот на АРМ во Градскиот парк ќе се одржи „Скопје бир фест“, првпат во организација на „Пасворд продукција“ и на градот Скопје, со четиридневна програма, многу пиво и бесплатен влез за време на целиот фестивал. Вечерва е резервирана за настапот на врвниот уметник на македонската музичка сцена Кирил Џајковски и миленичката на публиката ТК Вондер и вокалистот Лајон Д, а посетители ќе уживаат и во настапот на едни од најголемите и најдобрите изведувачи во живо, групата „Дубиоза колектив“ од Босна и Херцеговина. Ќе го проследиме и настапот на еден од најголемите македонски автори Горан Трајкоски, аудиовизуелниот спектакл на диџеј-дуото „Дискобајаги“ и стонеррок-бендот „Палиндром“.

Утревечер ќе го разбиваме малерот со настапот на д-р Неле Карајлиќ, легендата на „Топ листа надреалиста“ и „Забрањено пушење“, а првпат пред скопската публика и хипхоп-дуото од Црна Гора „Ху Си“. Љубителите на пиво и музика ќе имаат можност да ја видат и ултрапопуларна и провокативна трап-банда „МВР СВР“, најпознатиот реге-бенд кај нас „Конгеринг лајон“ и нивните сограѓани „Кепурдат“, чија музика знае да приреди уникатни доживувања.

Третата фестивалска вечер ќе ја отвори виртуозот на трубата, маестрото Џамбо Агушев со неговиот оркестар, а присутните нема да останат рамнодушни ниту на хитовите на мегапопуларниот српски бенд „САРС“. Пионерите на македонската рап-култура „Чиста околина“ по многу години ќе настапат во живо со цел бенд. На сцената ќе застанат и амбициозните и секогаш позитивните „ЗииБомб“ и предводниците на битолската рокпанк-сцена „Паркети“.

Последната фестивалска вечер ќе настапи најпровокативниот и култниот рокенрол-бенд „Лет 3“, џипсиска-бендот „Баилдса“, а фестивалот ќе го затвори српскиот рок-бенд „Ван Гог“ со старите хитови и промоција на новиот албум „Море без обале“.
„Скопје бир фест“ ѝ се приклучува на кампањата „Не пиј додека возиш“ за да ја издигне свеста на луѓето дека сo непочитување на прописите и со возењето под дејство на алкохол го загрозуваат сопствениот живот и ги доведуваат во опасност животите на другите учесници во сообраќајот.