Како изгледа орманче за лекови од 2 милиони евра?

61
Раното дело на светски познатиот уметник Демијан Хирст

Раното дело на светски познатиот уметник Демијан Хирст, орманче за лекови полно со шишенца пилули, ќе се најде на аукција за дури 2 милиони евра, 30 години откако сопственикот го купи само за 700 евра. Уште во 1989 година, љубителот на уметност, тогаш 28-годишниот Роберт Тиблс, го купи неконвенционалното дело на Хирст. Пријателите му се потсмеваа, зборувајќи му дека ги фрлил парите во ветер и купил ѓубре, не ни сонувајќи дека еден ден тоа орманче ќе постигне цена од вртоглави 2 милиони евра.

Ова дело на Хирст, кој тогаш се пробиваше на уметничката сцена, а денес е еден од најбогатите живи уметници, ќе се најде на аукција заедно со остатокот од колекцијата на Тиблс, во која има и дела од Мајкл Грег-Мартин и Гилберт и Џорџ.

– Тоа орманче ми остави длабок впечаток. Не можам да објаснам зошто морав да го купам, ама морав. Долго време луѓето се подбиваа со мене, велејќи ми „што ќе ти е ова во соба“ – изјави Тиблс, кој почнал да собира уметнички дела додека бил млад брокер.
И самиот Хирст се огласи на Инстаграм, каде што изјави дека многу добро се сеќава на Тиблс, кој верувал во него кога никој друг не верувал и му помогнал да ги направи првите чекори на уметничкиот пазар.

– Ова е едно од првите орманчиња што ги направив од вкупно 12. Тогаш немав асистенти, па ги составував сам, во својата кујна – откри Хирст, кој често изложува дела во кои продолжува да ја истражува естетиката на таблетите, медикаментите, шишињата и пилулите, и „духовната“ врска на човештвото со фармацевтската индустрија.