Изложба „Народните носии низ објективот на Тошо Дабац“

87

Вечерва, во 19 часот, во портата „Македонија“ ќе биде отворена изложбата „Народните носии низ објективот на Тошо Дабац“. Музејот на македонската борба – Скопје нуди ексклузивна можност да се видат фотографиите на еден од основоположниците на современата хрватска фотографија – Тошо Дабац. На изложбата ќе бидат претставени триесетина фотографии со мотиви од народни носии од различни краеви на Хрватска, БиХ, Македонија и други земји од регионот, во сопственост на Музејот на современата уметност во Загреб.

Изложбата се реализира во соработка со културниот центар „Травно“ и со Работилницата за заштита и изнајмување народни носии од Загреб, Хрватска, а е поддржана од Министерството за култура на Хрватска. На отворањето на изложбата ќе се обратат директорката на Музејот на македонската борба – Скопје, Даниела Николова, и директорот на културниот центар „Травно“, Јосип Форјан. Специјален настап ќе има ансамблот „Македонија“. Изложбата ќе биде отворена до 14 декември.

Тошо Дабац (1907-1970) е познат хрватски и светски фотограф и еден од основачите и главни претставници на т.н. Загрепска школа на уметничка фотографија. Во долгогодишната кариера има оставено зад себе повеќе од 200.000 фотографии, а негов најголем фокус била социјалната фотографија преку мотивите на животот на улица, питачи, народ на улица, циркусанти, панаѓури, процесии и сл.