Денис Јагџи ја фотографира урбаната скопска архитектура

65

Изложбата „Портретот на градот“, дипломски труд на младиот Денис Јагџи, ќе биде отворена вечерва, со почеток во 20 часот, во националната галерија „Мала станица“. На фотографиите како модели се јаaвуваат и неколку уметници, како и амбасадорот на Холандија.

– Архитектурата на градот Скопје поминувала низ многу периоди на својот развој. Поради сите овие промени што ги претрпувал, ги претрпува и ќе ги претрпува градот, и тоа не само директнo со градење или со рушење објекти туку и со мали промени и можеби додавање други елементи во просторот околу самите објекти што ја менуваат нашата перцепција кон нив. Се запрашав од кој период е вистинското лице на градот, кој објект го претставува Скопје – вели Јагџи за својата тема.

Големиот број направени фотографии не му го понудиле одговорот на тоа прашање, па затоа тој одлучил да спроведе истражување и да разговара со луѓе од областа на уметноста, како уметници така и љубители на уметноста, кои не остануваат рамнодушни на убавината на урбаната скопска архитектура. Единствен услов при ова истражување било испитаниците барем еден период од својот живот да живееле во Скопје.
– Разговарав вкупно со девет лица и им поставив две на изглед кратки прашања. Во првото да се претстават себеси, а во второто да го претстават градот со еден објект. По ова мало истражување на градот можеби за повеќето испитаници, симболот на градот е од периодот на брутализмот и градбите од натур-бетон, но за мене ниту еден објект не е симбол без нив самите. Тоа го сфатив откако и нив ги фотографирав пред објектот. Од моментот кога го здогледаа објектот, му се восхитуваа. Некои од нив најдоа вистински зборови, некои пробаа и со рацете да ги објаснат своите чувства, а на некои тоа едноставно им се гледаше во очите – вели Јагџи.

Денис Јагџи (1996) е студент на додипломски студии, на Катедрата по фотографија на Факултетот за аудиовизуелни уметности ЕФТА-Скопје, во класата на професорите Роберт Јанкулоски и Елена Бојаџиева. Неговите фотографии биле дел од повеќе групни изложби: „Идентитет“ (Дортмунд, 2018), „Идентитет“ (Скопје, 2018), „Скопје креатива“ (Скопје, 2017), „Теми од мојата земја Македонија“ (Скопје, 2018). Во 2016 година го освои првото место на фотонатпреварот „Мејкинг конекшнс“, организиран од Амбасадата на Холандија во Република Македонија.