Границите на Земјината атмосфера се наоѓаат многу подалеку од Месечината

104

Истражувачите дојдоа до неверојатно откритие. Надворешната атмосфера на Земјата се проширува многу подалеку отколку што се очекуваше, поточно околу 630.000 километри, што е приближно 50 пати повеќе од дијаметарот на нашата планета. Очигледно, таму не може да се дише, затоа што атмосферата станува поретка како што се оддалечуваме од Земјината површина, но ова откритие е значајно кога се работи за вселенските истражувања и патувања.

Овие откритија, објавени во Магазинот за геофизички истражувања, се направени благодарение на децениските набљудувања од страна на соларната хелиосферна опсерваторија на НАСА. Истражувањата се всушност направени пред неколку децении, а можат да се вршат само во определeни периоди од годината.

-Месечината се наоѓа во Земјината атмосфера. Не бевме свесни за ова се додека не ги искористивме податоците од истражувањата направени пред неколку децении од страна на СОХО- изјави Игор Баилукин, водечкиот автор од рускиот Вселенски институт.

Податоците покажуваат дека Земјината егзосфера е малку погуста отколку интерпланетарниот простор. На далечина од 384.000 километри (оддалеченоста на Месечината од Земјата), има 0,2 атоми на еден кубен сантиметар. На 60.000 километри од Земјата има 70 атоми на водород во еден кубен сантиметар и густината опаѓа на помалку од еден атом на кубен сантиметар на оддалеченост четири пати повеќе од истата. Наспроти малата густина, водородот стапува во реакција со сончевите зраци, поточно ултравиолетовите. Ова емитирање е она што им овозможува на научниците да ја изучуваат таканаречената геокорона.

-Во тоа време, астронаутите коишто се наоѓале на површината на Месечината не знаеле дека всушност се наоѓаат во геокороната- објаснува Жан-Лу Берто, коавтор.

Ова откритие може да има големо влијание и во истражувањето на егзопланетите. Ултравиолетово сјаење од водород во егзосферата на една планета сугерира на постоење на водна пареа блиску до површината. Ова е случај со Венера, Земјата и Марс. Детектирање на ваква појава околу една планета во друг ѕвезден систем може да ни посочи за постоење на воден резервоар на тоа место.