Атиџе овозможи светска промоција на „Медена земја“

1243
Документарецот премиерно ќе биде прикажан на 28 јануари, во Јута, САД, на најголемиот американски фестивал на независен филм „Санденс“

„Половина за мене, половина за тебе“, вели Атиџе кога го дели медот со пчелите. Таа е последната жена одгледувач на диви пчели во Европа. Живее сама со својата мајка, во напуштено село во централна Македонија. Атиџе води борба за рамноправност меѓу човекот и природата. Преку нејзиниот начин на работа апелира да земеме од природата онолку колку што ни треба. Нејзиниот живот, секојдневието, љубовта кон пчелите и медот, процесот на производство на мед, егзотичната врска меѓу човекот и природата се прикажани во 85-минутниот документарен филм „Медена земја“.

Филмот има цел да ја прикаже припадноста на човекот кон природата и нарушувањето на природната рамнотежа преку судир на два различни начини на искористување на Земјините ресурси, во случајов, пчелите и медот.

Она што го прави посебен документарецот „Ханиленд“, или „Медена земја“, е тоа што е препознаен во светски рамки. Приказната е толку моќна, што светот е желен да ја чуе. Својата премиера ќе ја има на 38-то издание на филмскиот фестивал „Санденс“, чие годинашно издание ќе се одржи од 24 јануари до 3 февруари во Јута, САД.

Премиерата е закажана за 28 јануари, по што ќе следуваат уште седум проекции на оваа кинематографска манифестација.

Документарецот е официјална конкуренција на престижниот фестивал за независни филмови, во категорија уште со 11 други филмови од целиот свет.

– „Санденс“ е најголем американски фестивал на независен филм и еден од најпрестижните во светот, на ниво на фестивалите во Кан, Берлин, Венеција… Ова е првпат македонски долгометражен документарен филм, со мнозинска домашна копродукција, да влезе во конкуренција на „Санденс“ – изјави продуцентот Атанас Георгиев.

Режисери на филмот се Љубо Стефанов и Тамара Котевскa, сниматели Фејми Даут и Самир Љума, на музиката се потпишуваат членовите на „Фолтин“, а музички супервизор е Рана Еид од „ДБ студиос“ од Бејрут.

– Филмот е повеќеслоен, го покажува животот сам по себе. Со нашето тригодишно присуство таму успеавме да доловиме раѓање, живот и смрт. Главната порака е дека треба да се има фер распределба, односно користење на природните ресурси. Тоа всушност е и принципот на одгледување на пчелите на Атиџе, која половина од медот го зема за себе, а половина им го дава на пчелите. Човекот треба да зема од природата онолку колку што му треба и да остави, секако, и за оној што произведува, во случајов пчелите. Со тоа не само што им овозможува на пчелите да преживеат туку има и сигурен извор на храна и за себе, тогаш кога ќе ѝ биде најпотребно. Ова звучи симболично, но ние успеавме да го доловиме буквално, како пример. Огромна благодарност до протагонистите што ни дозволија да влеземе во нивниот свет и да ги насликаме нивните животи – вели режисерот Љубо Стефанов.

Атиџе е 50-годишна жена. Како лик е многу значајна, таа живее во целосен склад со природата, во напуштено село, заедно со мајка си.

– Главниот заплет се случува кога фамилија номади ќе се насели на истата територија и ќе се случи борба за мед, затоа што нема доволно простор за две групи пчели. Фамилијата е член на консумеристичкото општество, не размислува за природата и иднината и зема сѐ што може да понуди природата. И нивните пчели ги напаѓаат пчелите на Атиџе – сподели режисерката Тамара.

Додава дека тригодишната работа на „Медена земја“ донела две клучни работи во нејзиниот живот: созревање како човек и автор и создавање една голема фамилија.
– „Ханиленд“ е животно училиште за сите нас, кое нѐ научи на многу поскромен однос кон животот. Може да се рече дека за големината на она што го направивме и ќе го оставиме светот да го види ни самите сѐ уште не сме доволно свесни и допрва ќе посведочиме – вели Котевска.

Снимателите се согласија дека со реализирањето на овој посебен филм стекнале уникатно и неповторливо искуство.

– Ова не може да се смислува однапред, да се режира. Едноставно, случувањата на терен си креираа сопствен тек на филмот – изјави Фејми.

Идејата за „Ханиленд“ потекна за време на теренските истражувања во степоликото подрачје на долниот дел на Брегалница, што изобилува со извонреден и уникатен биодиверзитет. Швајцарската агенција за развој и соработка ја препозна вредноста на овој документарец и затоа ја поддржа идејата за снимање и продукција.

– Филмот испраќа моќна порака, која очекуваме да ја издигне јавната свест за зачувување на природата, да го промовира одржливото користење на природните ресурси и да помогне и олесни при процесот на прогласување заштитени подрачја во Македонија – истакна Марјана Шушлевска, тим-лидерка на Програмата за зачувување на природата во Македонија.

Снимањето на филмот почна во 2015 година, а лани ја освои наградата за најдобро дело во развој на 23-от Сараевски филмски фестивал. Годинава го очекуваат презентации на значајни светски фестивали. Премиерата во Скопје ќе се одржи во почетокот на март.

Документарецот, кој е во продукција на „Аполо медиа“ и „Трис филмс“, е реализиран како дел од Програмата за зачувување на природата во Македонија – проект на Швајцарската агенција за развој и соработка (SDC), координиран од „Фармахем“, а поддржан од Агенцијата за филм на Република Македонија.

За претставувањето за време на „Санденс“ е ангажиран публицистот Рајан Вернер, кој ќе организира промотивен настан за филмот, на кој ќе се дегустира медот на Атиџе.