Објавен првиот зборник текстови за попреченост на македонски

104

Издавачката куќа „Темплум“ неодамна го објави зборникот „Попреченост: текстови за инвалидните тела“, прв од ваков тип на македонски. Книгата е објавена во едицијата теорија „20/21 век“. Книгата пренесува пет влијателни есеи од областа на „студиите за попреченост“ и, во вториот дел, дваесетина кратки есеи за телото. Уредникот Никола Гелевски во предговорот пишува дека
книгата има цел да го поттикне знаењето за попреченоста кај нас, сметајќи дека интелектуалното знаење за попреченоста пред сè ќе им овозможи подобро место во општеството на луѓето со попреченост. Наедно, овие текстови и кај пошироката заедница треба го приближат знаењето за попреченоста, со што ќе се поттикнат емпатијата, солидарноста и вклученоста во општеството.
Во еден од застапените есеи, Ленард Дејвис, светски познат стручњак во студиите за попреченост, го истакнува фактот дека лицата со инвалидитет сочинуваат 15 проценти од населението – најголемо физичко малцинство во многу земји. Според него, „податокот дека најверојатно многумина од телесно неоштетените денес ќе станат оштетени утре“ го повлекува прашањето: „Зошто инвалидноста не е препознаена како потенцијално универзална состојба? Иако таа навистина е тоа“.
– Овој мал зборник за попреченоста сака да биде, значи, ем интелектуален резервоар на клучните идеи за попреченоста ем поттик за развој на активизмот на луѓето со попреченост кај нас. На активизмот многу често му се потребни рефлексии и промислувања, за да фати чекор со поширокото опкружување, но и за подобро да се разбере самиот себеси – стои во предговорот.