Емотивни бранувања кај публиката која е љубител на класичната музика предизвика синоќешниот концерт на американско-израелскиот виртуоз на виолина Шломо Минц кој се одржа во рамките на Американската вечер на 62-то „Охридско лето“.

Пред почетокот на концертот се обрати вршителот на должност амбасадор на САД во Република Македонија, Ерик Мајер.

– Почестен сум што сум овде вечерва. Пресреќни сме поради нашето учество на овој фестивал, поради американската вечер со нашиот многу посебен виолинист. Се надевам дека публиката ќе ужива. Како дипломати тука во Република Северна Македонија, би сакал да потенцирам дека културната дипломатија ги надминува сите јазични и културни бариери, изјави в.д. амбасадорот на САД во земјава, Ерик Мајер.

Некогашното чудо од дете, Шломо Минц, молскавично се вивна во височините на светскиот виолински артизам и веќе долги години е на врвот на светските виолински имиња. Минц свиреше маестрално, со голема леснотија и брилјантна техника и со своето префинето музицирање во црквата „Света Софија“ уште еднаш покажа дека е уметник од највисок ранг.

– Свирев многу посебна и необична програма, необична дури и за мене, дела од Х.В. Ернст и Паганини. Тие биле професор и ученик. Ернст бил ученик на Паганини. Ова се смета за најтежок репертоар за виолинисти. Инаку, на овој фестивал сум третпат. Го обожавам Охрид и неговото прекрасно езеро и сите убавини околу него. Сакам да воспоставам врска со вашиот фестивал која се надевам ќе трае многу години – изјави маестро Минц.

Тој според многумина, вклучително и според колегите, публиката и критичарите е
еден од најзначајните виолинисти на нашето време поради неговата исклучителна
музикалност, стилска разновидност и беспрекорна техника.