По објавувањето на македонската сликовница „Џиновска продавница за фантазии“ на Бистра Георгиева од страна на една од најпознатите европски издавачки куќи „Трамунтана“, ова детско издание ќе може да се чита на шпански јазик и во сите држави во Латинска Америка, како и во САД. Илустрациите се на шпанската илустраторка Моника Каретеро, а сликовницата е издадена на шпански и на каталонски јазик и веќе неколку месеци може да се најде во книжарниците низ цела Шпанија.
„Џиновска продавница за фантазии“ беше промовирана во 2019 година, во издание на „Либи“, дел од „Арс ламина – публикации“ и е достапна во сите книжарници „Литература.мк“. Оваа книга ја претставува детската фантазија, сосема поинаква од онаа на возрасните: безгранична, нелогична, разиграна, смешна и максимално креативна. Главниот протагонист е Џинот, кој имал безброј фантазии, па решил да отвори продавница за фантазии, за да може секој да ги купи оние што му недостигаат. Сликовницата се разликува од другите по својот џиновски формат. Дополнително, станува збор за второ издание за деца на Георгиева, на кое му претходи сликовницата „Ото, Ото и Ото“.
Бистра Георгиева и Моника Каретеро, која е една од најпознатите европски илустраторки, соработуваат по вторпат. Каретеро е авторка на повеќе од 70 книги издадени во Шпанија, Англија, Австралија и во САД, а добитничка е и на повеќе престижни награди, меѓу кои за најдобра книга на лондонскиот и шпанскиот саем на книги.