„Рентгенска снимка на едно семејство“ на Фирузе Хосрованис ја доби наградата „Кромид“ за најдобар филм од главната програма на 12-то издание на „Македокс,“ кое заврши во четвртокот со прогласувањето на наградените филмови, проекцијата на долгометражниот документарец „Хелмут Њутн: Лошите и убавите“ на Геро фон Бом и со концертот на Тони Китановски и неговиот бенд во рамките на „Ноќни приказни“. На овогодишното издание на „Македокс“ беа доделени пет награди и четири специјални признанија.

– Преку својот брилијантен наративен стил, таа мајсторски го испреплетува архивскиот материјал од минатото со сопствените семејни слики и писма, додавајќи ги нивните недоследности и недостатоци, па оттаму ја расплетува приказната на неодоливо привлечен начин што овозможува подлабоко разбирање – се наведува во образложението на жирито во состав Адел Кохут, Едима Отуокон и Хеле Хансен, за доделувањето на наградата за „Рентгенска снимка на едно семејство“.

„Гунда” на Виктор Косаковски доби специјално признание во главната програма, бидејќи, како што беше истакнато, „ни дава увид, причина за размислување и набљудување на нашето однесување како луѓе. Направен со голема почит и љубов кон животните, овој филм нѐ импресионираше и нѐ трогна. Зачудувачките визуели на Гунда директно го прикажуваат животот на животните, потсетувајќи нѐ дека животните навистина си имаат свој јазик и дека ако човештвото сака да опстане, ќе мора да слуша“.

Комисијата во состав Викторија Лешченко, Кристин Камдесу и Марион Шмит, ја додели наградата „Млад кромид“ во категоријата „Нови автори“ на „Дида“ на Никола Илиќ и Корина Швингрубер Илиќ, додека специјално издание доби филмот „Помирување“ на Марија Зидар.

„Играта“ на Роман Ходел е најдобар краткометражен документарен филм и добитник на наградата „Сечкан кромид“, според комисијата во состав Ивана Тодоровиќ, Маја Новаковиќ и Микеле Сини, бидејќи „режисерот нуди нова перспектива на фудбалот, неверојатни визуели и аудио елементи проткаени во емотивна човечка приказна“. „Парченце рај“ на Анджеј Сичоцки доби специјално признание.

„Веќе никаде не се чувствувам како дома“ на Вив Ли ја доби наградата „Кокарче“ за најдобар студентски филм.

– Овој филм ни даде можност да искусиме длабока тага и носталгија кон домот, комбинирајќи го тоа со иронични моменти – потенцира жирито во состав Јулија Коваленко, Питер Зах и Ингибјорг Халдорсдотир.

Специјално признание во студентската програма доби „Си беше еднаш една младост“ на Иван Рамљак. Признанието за филм со најдобри етички идеи му припадна на „Луѓето од гаражите“ на Наталија Јефимкина.

– Сакавме да оддадеме почит на скромноста и интелигенцијата со која филмот ја опфаќа оваа галерија на животи кои се чини дека лесно се осудени на презир и заборав. Преку враќањето до ДНК-та на документарниот гест, Наталија Јефимкина трпеливо ја преведува на платното органската реалност што ја набљудува. Таа секогаш ги почитува ликовите со нивниот природен ритам, никогаш не ги поедноставува сложеностите на нивното постоење, ниту ги истенчува бројните слоеви на нивната реалност, и никогаш не ја користи нивната оригиналност ниту нивната чудност со цел да манипулира, осудува или да се исмева. На овој начин таа прави многу повеќе од тоа што ни ги претставува овие животи; таа се бори против искушението светот што ги опкружува да не ги помеша овие „луѓе од гаражите“ со луѓе од „ѓубрето“. Наместо тоа, таа ни покажува, зад секоја од овие скромни врати, постојано рециклирање на нештата, животот, креативноста, љубовта, спомените и прашањата. Таа нè потсетува дека колку и да ни се ограничени нашите човечки искуства во времето и просторот, сепак тие содржат големи резерви на достоинство, и дека тоа достоинство е истовремено скапоцено, кревко и убаво – нагласи жирито во состав Кристина Горовска, Танкред Ривиер и Ацо Палитов.