Фестивал на краток филм „Дрим шорт“ во Струга

43

Третото издание на фестивалот на краток филм „Дрим шорт“ ќе се одржи од 27-ми до 29-ти декември во Струга под мотото „Погледни под површината“.

– Фестивалот на краток филм ја оствари примарната цел и го продолжува континуитетот и фестивалот станува традиција. Последниот декемвриски викенд ќе ги згрееме срцата со повеќе од 40 различни кратки приказни од светот. Првата новост на фестивалот е тоа што за првпат националната, студентската и интернационалната категорија ќе имаат натпреварувачки карактер. Регионалната програма прераснува во интернационална, а селекцијата ќе ја прави нашиот драг соработник и селектор Иван Бакрач. Филмската програма ја заокружуваме со гостинска програма од реномираниот фестивал на кратки филмови Interfilm од Берлин. Секако продолжуваме со отворените мастерклас сеанси и разговори со познати филмски имиња на теми кои сигурно ќе ги заинтересираат младите филмаџии. Годинава мастерклас ќе одржи Ингрид Бирбаум, новинарка, филмски критичар и селектор на документарната програма на interfilm, на тема ,,Како до фестивалска дистрибуција на краткиот филм” и ,,Медени разговори” со режисерите на ,,Медена земја” Тамара Котевска и Љубомир Стефанов, кои пред публиката ќе ги пренесат своите искуства за кратката филмска форма и ќе ги споделат импресиите од неодамнешните успеси. За крај ја најавуваме музичката ОФФ програма како неизбежен белег на нашиот фестивал, со која малку порано ќе ги започнеме празничните прослави. И оваа година ќе се обидеме да анимираме нови простори во градот, создадени или рекреирани специјално за фестивалот „Дрим шорт“ во НУЦК ,,Браќа Миладиновци “- Струга. Со тоа не само што ги носиме луѓето назад во кино и во матичната институција, туку пред се’ создаваме импровизирани кино сали „под површината” и таму каде што ги нема. Целта е да се заживеат на поинаков начин некои сегменти од институциите кои никогаш не се користат или имаат сосема тривијална намена. Истовремено, да укажеме на потребата од мала кино сала која на градот му е неопходна во зимскиот период – соопштија организаторите.