Студиото на „Арт поинт Гумно“ отворено за посета

47

Вo демирхисарското село Слоештица, во отвореното студио на интернационалната уметничка резиденција „Арт поинт Гумно“, која годинава се реализира на тема „Природата предупредува: Будни ли сте?!“, денеска ќе се слават уметноста и природата. Преку уметноста, пораки за заштита на природата и планетата Земја ќе испратат уметниците: Иштван Ерос од Унгарија, Дик Робертс од САД, Сашо Н. Алушевски од Македонија, Џесика Флеминг од Германија и Естер Шабак од Словачка. Освен на отворено, изложбата ќе биде поставена и во галеријата на гумното, која е единствена од таков вид на Балканот.

– Инспирирани од исклучителното природно богатство на горнодемирхисарските планини, кои, за жал, не се поштедени од глобалните климатски промени, уметниците, преку своите дела, протестираат и провоцираат во име на природата. Со овие активности се приклучуваме на „Глобалната недела на акција за климатските промени: 20 – 27 септември 2019“, посочуваат од „Арт поинт Гумно“ и информираат дека посетителите на отвореното студио денеска од 12 до 20 часот ќе имаат можност и лично да се запознаат со уметниците.