Самостојна изложба на хрватскиот уметник Владимир Фрелих

50

Вечерва, со почеток во 20 часот, во Музејот на современата уметност во Скопје ќе се отвори самостојна изложба на хрватскиот уметник Владимир Фрелих, насловена „Блак ро мемори“.

– Нештата што нѐ опкружуваат и со кои сме во некаков вид односи, оставаат во нас емотивна трага. Колку и да сме индиферентни кон одредена работа или пак субјективно заинтересирани, на крајот сѐ може да се сведе на две категории: на нашиот позитивен или негативен став. Низ позитивна призма го гледаме сето она од што не сакаме да се ослободиме, она со што се опкружуваме, што го собираме и претрупуваме, градејќи слика за себе. Другото, што од каква било причина не ни се допаѓа и го сметаме за потрошено, расипано или непријатно, ако не со брза одлука, тогаш постепено го потиснуваме од себе, складирајќи го на некое место каде што нема да ни се испречува и да нѐ потсетува во секој момент. Со време тоа место е сѐ пооддалечено од нас. Според уметникот, поединци, општества, институции, села, градови, држави, секојдневно ги отфрлуваат деловите од својот мемориски и материјален идентитет, градејќи за себе утописка, епско идеална слика во огледало – се вели во најавата.

Владимир Фрелих е хрватски уметник од Осиек. Дипломирал на Ликовната академија во Дизелдорф, Германија. Се занимава со концептуално мултимедиумски дела, кои доаѓаат често до граничните подрачја на медиумот. Од 2007 година е професор на Уметничката академија во Осиек, на отсекот за мултимедиуми, а од 2010-та е гостин професор на Академијата за уметности во Нови Сад.