Промовирана „Последната книга на планетата земја” во Крива Паланка

39
Во организација на Националната установа Центар за култура Крива Паланка синоќа се одржа промоција на книгата „Последната книга на планетата земја” од младиот автор Филип Петровски од Куманово.
 
Романот е втора книга проза на Петровски, која за разлика од првата психолошко- филозофска, е научно-фантастичен трилер, со елементи на авантуристички роман.
 
– Ова е дело со пост-апокалиптична тематика, говори за блиската иднина во која луѓето се опседнати со паметни телефони и мислат дека интернетот им носи олеснувања и придобивки, но во нив се вградени чипови и тие се контролираат во секое движење. Главниот лик интуитивно сака да ги спаси, но до последните страници не се знае кој и дали ќе преживее. Книгата упатува на човечноста во човекот, на човекољубието – изјави авторот Петровски.
 
Тематиката е современа, а научно-фантастичното што провејува во книгата, на промоцијата беше надополнето со музичката изведба.
 
Филип Петровски е роден во Куманово во 1993 година, дипломирал на Факултетот за музичка уметност, фаготист, а „Последната книга на планетата земја” премиерно беше промовирана во декември 2018 година. Петровски е автор на уште една книга, „Светот во световите”.