Претставена „Во градината има само љубов“ на Филип Димкоски

47

Младиот поет Филип Димкоски завчера во домот на културата „Кочо Рацин“ ја претстави својата нова поетска книга „Во градината има само љубов“. Уредник на изданието е Александар Димкоски, таткото на младиот поет, кој и самиот пишува песни. Тој на почетокот дава опширен предговор насловен „Омеѓување“.
– Филип, не само што е вљубеник во градината, тој рај од скротена природа, Филип е и познавач на градината. Уште повеќе тој е препознавач на љубовта во неа – пишува Гордана Попсимонова во рецензијата.
Васил Тоциновски истакнува дека новата книга на Димкоски е уметнички и естетски исчекор на авторот. Писателката и литературна критичарка Снежана Алексиќ Станојловиќ од Србија, во рецензијата забележува дека Димкоски остава препознатлив поетски белег, а критичарка Ина Крејн од Бугарија книгата ја именува како „поетска Библија“.
Вечерта со својата гитара ја збогати и Џина Папас-Џокси, а поезијата сугестивно и со многу емоции ја говореше самиот автор.