Научен симпозиум „Денови на Јустинијан Први“

50

Во Музејот на македонската борба беше отворен меѓународниот научен симпозиум „Денови на Јустинијан Први“, кој се одржува веќе осма година, во организација на Институтот за национална историја на универзитетот „Св. Кирил и Методиј“ и Универзитетот во Болоња, во партнерство со православниот богословски факултет „Св. Климент Охридски“.
На отворањето, присутните ги поздрави и министерката за култура Ирена Стефоска, која истакна дека овој форум има бесценета задача – преку размена на академски аргументи да го покаже најдоброто од минатото и како поглед да ѝ го пренесе на иднината. Потврда за ова е фактот што годинава со свои реферати ќе настапат педесетина еминентни професори и научници од 17 земји.
На симпозиумот свое пленарно предавање одржа проф. Антонио Риго од универзитетот „Ка Фоскари“ од Венеција, кој истовремено е претседател на Италијанскиот византолошки комитет, кој ќе биде домаќин на Светскиот византолошки конгрес во 2022 година, во Венеција и во Падова. На симпозиумот, со свои реферати (меѓу кои и некои онлајн) настапија педесетина еминентни професори и научници од САД, Велика Британија, Австралија, Италија, Русија, Полска, Чешка, Финска, Романија, Холандија, Австрија, Унгарија, Србија, Хрватска, Албанија и Грција.
Манифестацијата претставува годишен научен форум за презентација на најновите истражувања за различни аспекти на византолошките и средновековните студии, што ги вклучува третманот и интерпретацијата на културното, историското и духовното наследство во современа Европа.