Македонски и странски археолози ќе говорат за неолитското наследство

125

На конференцијата ќе бидат презентирани тековните резултати од истражувањата на неолитските локалитети во полошкиот, струмичкиот, охридскиот, велешкиот, скопскиот, овчеполскиот, кривопаланечкиот, струмичкиот, струмскиот, тракискиот,
софискиот, кочанскиот, виничкиот, мариовскиот и во пелагонискиот регион

Конференцијата „Неолитот во Македонија“, која Центарот за истражување на предисторијата ја иницираше пред пет години, ќе се одржи на 20 и 21 декември во Археолошкиот музеј на Македонија. Таа го има своето јубилејно петто издание и поради зголемениот интерес на археолозите, првпат се одржува два дена (петок и сабота). На конференцијата ќе се изложат 24 реферати што ќе бидат презентирани од триесетина археолози од Македонија, Србија, Албанија, Бугарија и од Шпанија. Македонските и странските археолози ќе говорат за најновите сознанија поврзани со неолитското културно наследство во Македонија и околните земји, а наедно ќе дискутираат за научните проблеми што се однесуваат на голем број отворени прашања во рамките на предисториската археологија.

– На конференцијата ќе бидат презентирани тековните резултати од истражувањата на неолитските локалитети во полошкиот, струмичкиот, охридскиот, велешкиот, скопскиот, овчеполскиот, кривопаланечкиот, струмичкиот, струмскиот, тракискиот, софискиот, кочанскиот, виничкиот, мариовскиот и во пелагонискиот регион, вклучувајќи ги и резултатите од кабинетските, теренските и теориските проучувања. Ќе бидат промовирани и новите методи што се применуваат при истражувањето на неолитските населби во Македонија и на Балканот, како што се просторните, геомагнетните, етноархеолошките, археоботаничките, фотограметриските и зооархеолошките анализи, но и тековните пристапи во толкувањето на металот, хронологијата, архитектурата, стелите, садовите и ритуалите – најавуваат организаторите.

Во рамките на конференцијата ќе биде промовирано најновото издание на Центарот за истражување на предисторијата, односно зборникот на трудови „Неолитот во Македонија: во чест на Воислав Санев“. Во рамките на конференцијата, в сабота предавање ќе одржи Милош Спасиќ од Музејот на градот Белград, еден од најистакнатите млади српски предисторичари, кој ќе говори на темата „Доцнонеолитската винчанска култура во Централен Балкан: заедници што создадоа големи наративи“.

Конференцијата е резултат на темелната соработка меѓу Центарот за истражување на предисторијата и Археолошкиот музеј на Македонија и таа е финансиски поддржана од Министерството за култура.