Изложба на скулптури од Марјан Стојаноски во Прилеп

49

Изложба на скулптури од прилепскиот уметник Марјан Стојаноски вечерва ќе биде отворена во ликовната галерија од ЦК „Марко Цепенков“ во Прилеп, со почеток во 18:30 часот.

Ова му е прва самостојна изложба во родниот град.

Академскиот скулптор Марјан Стојаноски создава апстрактно геометриска скулптура изработена од метал, како најсоодветен материјал за обликување на неговите концепти.

– Податливоста на металот како материјал за изработка на скулптурата, како и техниката на заварување, му овозможува на скулпторот да создава различни по форма, структура и големина, делови и конструктивни елементи. Преку дисциплинирана техничка постапка, Стојаноски создава идејни решенија и концепти за монументална скулптура во урбан простор – вели Викторија Димеска, историчар на уметноста.

Марјан Стојаноски завршил Факултет за ликовни уметности во Скопје во класата на професорот Ибрахим Беди. Член е на ДЛУМ и на ДЛУП. Во два наврати е претседател на ДЛУП. Во 2015 година ја добива наградата за скулптура „ Јордан Грабул“ (ДЛУП). Досега реализирал повеќе проекти, меѓу кои скулптура „Мир“ во чест на Тоше Проески, скулптура „Еко (велоспедист), поставени во центарот на Прилеп и реализација на статуетка за награда од публика за МТФ „Војдан Чернодрински“.

Учестувал на повеќе колонии и на бројни конкурси каде освоил награди.

Ка.М.