Излезе книгата „Песни за Палестина“ од Манојлов

137

Деновиве од печат излезе најновата книга поезија на битолчанецот Панде Манојлов, насловена „Песни за Палестина“, која содржи шеесетина песни исклучиво посветени на Палестина и страдањата на палестинскиот народ под окупација и неуморната борба да дојде до слобода. Првата песна посветена на Палестина, Манојлов ја објави во септември 1982 година во весникот „Нова Македонија“, инспириран од крвавите напади на палестинските логори „Сабра“ и „Шатила“, во кои беа убиени и ранети илјадници Палестинци.

– Песната веднаш беше препеана на арапски јазик од тогашниот скопски студент од Палестина, Абас Абделкарим, и објавена во четиринаесет држави од арапскиот свет. Другите песни се напишани во последните триесетина години – вели Манојлов.

Панде Манојлов е автор на дваесет и осум книги поезија и проза, дел од неговите песни е објавуван на повеќе јазици во светот. Манојлов е член на Друштвото на писателите на Македонија, како и на Македонското научно друштво-Битола.