Документарни филмови посветени на браќата Манаки во Кинотека

45

Два документарни филмови посветени на браќата Манаки ќе бидат прикажани во Кинотека на 30 април.

На 30 април со почеток во 18 часот ќе се прикажува документарниот филм „Манаки- Приказна во слики“ (Manaki – Story in Pictures)

Во режија на Роберт Јанкулоски, сценариото е на Илинденка Петрушева, Роберт Јанкулоски.

Филмот ја прикажува фотографската работа на Јанаки и Милтон Манаки, првите балкански кинематографери. Со текот на годините браќата Манаки се митологизирани, а додавањето на нови и непотврдени информации со цел да се зголеми нивната важност е непотребно и штетно, бидејќи нивното творештво и онака е од големо културно значење не само во Македонија туку и во поширокиот балкански контекст.
Од оваа причина, секој факт и мислење презентирани во филмот МАНАКИ – ПРИКАЗНА ВО СЛИКИ се внимателно истражени и потврдени со презентирани артефакти.

Приказната се раскажува преку оригинални документарни фотографии следејќи ја нивната работа од отворањето на првото професионално студио во 1898 година во Јанина и подоцнежното селење во Битола, сега познат како град на браќата Манаки.

Со почеток во 20 часот на 30 април ќе се прикажува документарниот филм Студија на Случај: Браќа Манаки, (Frații Manakia. Jurnalul unei lungi priviri înapoi / The Manakia brothers. Diary of a long look back).

Сценариото и режијата е на Елиза Здру. Нејзината идеја да направи документарец како СТУДИЈА НА СЛУЧАЈ: БРАЌА МАНАКИ се родила на многу интересен начин. Елиза пронашла стара фотографија од своите предци од 20-тите години на минатиот век, која, иако немала потпис, многу потсетувала на стилот на браќата Манаки.

Истражувањето околу семејната фотографија постепено се испреплетувало со приказната за животот и делото на браќата Милтон и Јанаки Манаки, а Елиза документарецот, освен во Романија, го снимала и во Грција, Бугарија и во Македонија.

Дел од документарецот го снимала на улиците на Битола, а во 2017 СТУДИЈА НА СЛУЧАЈ: БРАЌА МАНАКИ ја имаше честа да биде прикажан на Интернационалниот филмскиот фестивал на кинематограферите „Браќа Манаки“. Говорејќи за искуството од снимањето на филмот, Здру истакнува дека во Романија, Грција, Бугарија и во Македонија, каде што истражувала и го реализирала „СТУДИЈА НА СЛУЧАЈ: БРАЌА МАНАКИ„, слушнала дека браќата Манаки си припаѓаат единствено сами на себе, тие се пионери на кинематографијата на овие простори.

Критичарите ѝ предвидуваат професионален успех на Здру поради нејзиниот студиозен и креативен пристап во „СТУДИЈА НА СЛУЧАЈ: БРАЌА МАНАКИ“.