Фото: Принт-скрин

Човекот обвинет за убиството на поранешниот јапонски премиер Шинѕо Абе ѝ кажал на полицијата дека се обидел да направи бомба, објавија јапонски медиуми повикувајќи се на истражни извори.

Тецуја Јамагами (41), кој е осомничен дека го застрела Абе со рачно изработен пиштол од непосредна близина за време на говор за предизборната кампања, ѝ рекол на полицијата дека направил и повеќе оружја.

Полицијата го пребарала неговиот дом во западниот град Нара, конфискувајќи пиштоли слични на оној пронајден на местото на настанот откако Абе беше застрелан во петокот.

Обвинетиот по апсењето рекол дека дејствувал од омраза кон религиозна група која го поддржува Абе, се вели во извештаите. Според Јамагами, неговата мајка донирала големи суми на верска организација, која ја уништила.

Ниту полицијата, ниту јапонските државни медиуми се уште не ја именуваат групата. Меѓутоа, онлајн магазинот „Гендај Бизнис“ сега тврди дека од неименувани извори дека станува збор за контроверзната црква за обединување на покојниот јужнокорејски верски и деловен водач Сан Мјунг Мун.

Исто така позната како „Секта на Месечината“, црквата на обединување има членови во многу земји, вклучително и Јапонија, и е основана од Мун во 1954 година. Институцијата привлече критики за аспирациите за светска доминација и систематското организирање на нејзините масовни свадби.