Конфликтот во Украина ќе продолжи да доминира денеска на агендата на вториот ден од тридневниот самит на лидерите на Г7 во Германија, при што украинскиот претседател Владимир Зеленски ќе се приклучи на разговорите преку видеоврска.
Лидерите на Велика Британија, Канада, Франција, Германија, Италија, Јапонија и САД вчера дојдоа во одморалиштето Шлос Елмау во Баварија со цел заеднички да го зголемат притисокот врз Русија да ги повлече своите трупи од Украина и да ги ублажат негативните влијанија од војната.
Лидерите на Г7 веќе го искористија самитот како форум за најава за забрана за увоз на руско злато и заедничка инфраструктурна иницијатива за спротивставување на кинеското влијание во земјите со среден приход. Во тек се и разговори за можно ограничување на цената на нафтата.
Во неделните дискусии учествуваа и претседателката на Комисијата на ЕУ Урсула фон дер Лејен и претседателот на Советот, Шарл Мишел.
Германија претседава со Г7 оваа година, а канцеларот Олаф Шолц ќе биде домаќин на лидерите на демократските земји кои не се членки на Г7, Аргентина, Индија, Индонезија, Сенегал и Јужна Африка за да разговараат за климатската криза, јавното здравје и енергетската безбедност.
Генералниот секретар на ОН, Антонио Гутереш, треба да се придружи на групата преку видео-врска за да се справи со кризата со храна која произлезе од војната во Украина, која сега е во својот петти месец.
Конфликтот спречува житото да ги напушти пристаништата во земјата и ја поскапува храната ширум светот, при што експертите и хуманитарните групи предупредуваат на потенцијалот за глад во делови од Африка и на други места, јави ДПА.
Безбедносната исклучена зона околу местото на настанот – каде што Германија исто така го одржа својот последен Г7 во 2015 година – ја „запечати“ во изминатата недела областа за секој без дозвола.
Околу 18.000 припадници на безбедносните сили се задолжени за самитот да го одржуваат редот за време на бројните планирани демонстрации.
