Папата Франциск го искористи новогодишното обраќање за да повика на прекин на насилството врз жените и рече дека тоа е навреда за Бога. Папата служеше миса во базиликата Свети Петар на денот кога Римокатоличката црква го слави празникот Света Богородица, јавува Ројтерс.
Тој својата новогодишна проповед ја фокусираше на темите за мајчинството и жената и рече дека тие се оние кои ги држат конците во животот.
Папата ја искористи приликата да упати еден од своите најсилни повици да се стави крај на насилството врз нив.
„Бидејќи мајките ги даваат своите животи, а жените го одржуваат светот заедно, ајде сите да вложиме поголеми напори да го промовираме мајчинството и да ги заштитиме жените. Колку насилство е насочено врз жените! Доволно! Да се повреди жена значи да се навредува Бог“, рече папата.
Откако започна пандемијата на ковид-19 пред речиси две години, папата неколкупати се изјасни против семејното насилство, кое се зголеми во многу земји поради изолацијата, кога многу жени беа оставени од насилниците.
Се чинеше дека папата е во добра здравствена состојба по необјаснивиот инцидент на новогодишната ноќ кога присуствуваше на богослужбата, но мисата не ја водеше во последен момент, како што се очекуваше, анализираат медиумите.
На почетокот на мисата денеска тој ја прошета целата должина на централниот коридор на базиликата, за разлика од петокот вечерта, кога гледаше од страна.
Папата Франциск боледува од ишијас, што предизвикува болки во нозете, а понекогаш нападот го спречува да стои подолго време, јавува Ројтерс.
