Специјалниот пратеник на САД за Западен Балкан Габриел Ескобар изјави дека се надева дека Србија ќе им се придружи на другите земји од Западен Балкан и ќе воведе санкции кон Русија по формирањето на новата влада во Белград.
– Речиси сите земји од Западен Балкан се согласија на некој начин да ја натераат Русија да ја плати цената за таа (инвазија) преку санкции, преку поддршка за Украина и нејзиниот народ. Се надевам дека Србија ќе се приклучи на таа група и дека ќе се усогласи со санкциите кога ќе ја формира Владата – рече Ескобар во онлајн обраќањето на Самитот за демократија на Југоисточна Европа во Будва.
Тој на собирот на кој присуствуваа претставници од САД, ЕУ, Велика Британија и од Западен Балкан рече дека Србија е единствената земја во регионот која не воведе санкции кон Русија.
Американскиот пратеник го поздрави фактот што и ЕУ и НАТО ја потврдија „политиката на отворени врати“.
– Мислам дека е важно ЕУ да ја потврди својата политика на отворени врати. И таа политика не се однесува само на Украина и другите земји во ризик, туку нè потсетува и дека уште шест земји се во ред пред Украина – посочи Ескобар.
Тој посочи дека земјите од Западен Балкан постигнале „огромен напредок“ и „импресивни реформи“ и изрази надеж дека Европа ќе го спроведе она што го кажува денес кога станува збор за европската интеграција на Западен Балкан.
Турскиот министер за надворешни работи Мевлут Чуавушоглу изјави дека Турција нема да се приклучи на санкциите против Русија.
Тој исто така изјави дека украинскиот претседател Владимир Зеленски побарал да се сретне со рускиот претседател Владимир Путин.
– Санкциите против Русија ја погодија и Турција. Тие ја разбираат нашата позиција и тоа мора да се разбере со оглед на нашата посредничка улога. Нашата позиција е јасна, нема да се приклучиме кон санкциите и нема да дозволиме тоа да се прави преку нас – рече Чавушоглу во соопштение за турската агенција Анадолија.
Чавушоглу додава дека Зеленски за време на телефонскиот разговор со турскиот претседател Реџеп Таип Ердоган рекол дека сака да се сретне со рускиот претседател Владимир Путин.
– Буквално вчера за време на разговорите Зеленски рече дека сака да се сретне со Путин. Турција продолжува да прави напори – рече Чавушоглу.
