Во Албанија од вчера се во сила новите мерки против коронавирусот. Владата на Албанија соопшти дека ниту еден странски или албански државјанин не може да влезе во земјата без потврда за негативен тест за коронавирус или доказ за вакцинација.
На влезот на државата ќе биде потребно да се покаже сертификатот за вакцинација, со поминати најмалку две недели од целосната вакцинација, негативен ПЦР-тест не постар од 72 часа или антигенски не постар од 48 часа, или да се покаже потврда за прележан коронавирус.
Децата до шест години се ослободени од ваквите мерки, а правилата важат за сите патници што се движат низ територијата на Албанија. Доколку лицата ги немаат потребните документи при пристигнувањето во државата, ќе бидат ставени во десетдневен карантин.
Покрај ова, во Албанија е воведен полициски час од 23 часот до 6 наутро.