Словенечкиот портал „Нецензурирано“ го објави наводниот нон-пејпер, односно неофицијалниот дипломатски документ за новите поделби на територијата на поранешна Југославија.

Документот, кој крена прашина во регионот во последните денови, зборува за идеи за распарчување на Босна и Херцеговина, припојување на Република Српска кон Србија и обединување на Косово со Албанија, а се шпекулира дека словенечкиот премиер Јанез Јанша го испратил нон-пејперот до Брисел.

Никој официјално не потврди дека претседателот на Европскиот совет, Шарл Мишел, добил документ со таква содржина од Словенија. Но, неофицијален дипломатски документ што предвидува распад на Босна и Херцеговина, припојување на Република Српска кон Србија и обединување на Косово со Албанија, всушност постои, тврди „Нецензурирано“.

Според информациите на словенечкиот портал, документот под наслов „Западен Балкан – патот напред“, наводно, бил примен од кабинетот на Шарл Мишел во февруари.

Кој го напишал документот не може официјално да се знае. Според словенечките новинари, тоа сигурно не било напишано во словенечкото Министерство за надворешни работи. Според некои информации, дел од неговата содржина може да биде напишана во Будимпешта. Меѓутоа, во дипломатските кругови во Брисел, тој се нарекува „словенечки“ документ, бидејќи кабинетот на Јанша наводно учествувал во неговото испраќање на разни адреси.