Харадинај го повика Белград на дијалог, но без инволвирање на таксата

103

Косовскиот премиер Рамуш Харадинај денеска го повтори ставот на неговата Влада дека единствена можност да се укине таксата од 100 отсто на увозот на српски производи е меѓусебното признавање на Косово и Србија, јави дописникот на МИА од Приштина.

Харадинај за време на денешната посета на Гњилане повика на продолжување на дијалогот со Белград, но без инволвирање на таксата во тоа прашање.

Kосовскиот премиер рече дека царините остануваат „и покрај постојаните притисоци“ од САД и Европската унија, додека патот за нормализацијата на односите со Србија е признавањето на Република Косово од страна на таа држава.

– Таксата е воведена и таа останува, но начинот да не ги расипеме односите со Америка и начинот да ги зајакнеме и, верувам, и да ги средиме односите со Србија, е да се постигне меѓусебно признавање Косово-Србија во постоечките граници. Длабоко сум уверен дека ќе се најде начин да се вратиме на дијалогот со Србија, бидејќи и Србија и ние тежнееме кон зачленување во ЕУ, без дијалогот да се поврзе или условува со таксата – изјави Харадинај.