Протест пред француската амбасада во Бугарија против одлуката на Макрон

639

Десетици интелектуалци, јавни личности и граѓани вечерва се собраа пред француската амбасада во Софија за да го искажат своето несогласување со одлуката на францускиот претседател, Емануел Макрон, да го блокира почетокот на претпристапните преговори на Македонија и Албанија.

Како што пренесува „БГНЕС“ учесниците извикуваат „Бугарија и Македонија под едно небо!“, „Не на лицемерие, Да на Македонија“.

-Сведоци сме за заживување на француско-српската унија, која последниве години беше запоставена и има за цел да ја блокира европската иднина на Македонија – изјави познатиот балкански специјалист и публицист, Иван Николов.

Тие повикаа на „бескомпромисна и постојана поддршка за европското членство на Македонија, бидејќи во спротивно поддршката од надворешни националисти ќе го дестабилизира целиот регион“.

Учесниците на собирот го повикаа Макрон да ја преиспита неговата одлука и да биде во висина на големите француски државници, како Де Гол и Ширак и да не ја загрозува стабилноста и безбедноста на Балканот. Тие истакнаа дека „ова е прв протест во Европа за членство на една држава во ЕУ“.

Во писмото до Маркон, кое го доставија на претставник на француската амбасада, организаторите на собирот го повикаа францускиот претседател да не дозволи „Република Македонија да биде извор на политички хаос“.