Канцеларијата за буџет на Белата куќа му наредила на Пентагон да ги замрзне финансиските средства за одбраната за Украина само 90 минути по телефонскиот разговор помеѓу претседателот Доналд Трамп и украинскиот колега Володимир Зеленски, пренесува Си-ен-ен. Мајк Дафи од канцеларијата за управување и буџет на Белата куќа, одговорен за контролирање на парите за национална безбедност, ги известил претставниците на Пентагон на 25 јули дека ќе суспендираат околу 400 милиони американски долари помош за Украина. Истиот ден било испратено и официјално известување дека помошта била задржана непосредно по телефонскиот разговор за време на кој Трамп извршил притисок врз Зеленски да ги испита политичките противници на американскиот лидер. Станува збор за бившиот американски потпретседател и можен главен противкандидат на Трамп во 2020 година, Џо Бајден, и неговиот син Хантер Бајден. Од друга страна, Канцеларијата за управување и буџет ја отфрли врската помеѓу одлуката за суспендирање на помошта и телефонскиот повик, истакнувајќи дека таа е објавена на состанокот помеѓу агенциите кон средината на јули. Претставничкиот дом на американскиот Конгрес минатата недела изгласа импичмент на Трамп за две обвиненија поврзани со Украина. Сега процесот за отповикување на претседателот се сели во Сенатот, каде што малку е веројатно републиканското мнозинство да изгласа импичмент против актуелниот шеф на Белата куќа.
