Американскиот претседател Доналд Трамп изјави денеска во Хелсинки дека не гледа причина да верува дека Русија ги хакирала претседателските избори во 2016 година за да му помогне да победи, а Владимир Путин „беше исклучително силен и моќен во неговото негирање денеска”.
– Претседателот Путин беше исклучително силен и моќен во неговото негирање денеска, рече Трамп на прес-конференција по средбата со Путин во Хелсинки.
Трамп изјави дека го покренал прашањето за наводното руско мешање на американските избори во разговорите со рускиот претседател Владимир Путин.
– Поминавме многу време разговарајќи за тоа.
Путин го негираше таквото мешање, велејќи дека обвинувањата се „целосна глупост”.
– Руската држава никогаш не се меша и нема да се меша во внатрешните прашања на САД, вклучувајќи го и изборниот процес, рече Путин на прес-конференцијата.
Путин потенцираше дека е подготвен да соработува со САД за „да ги анализираат заедно” сите конкретни материјали поврзани со наводното мешање во изборите.
– На пример, ние можеме да ги анализираме преку заедничката работна група за сајбер-безбедност, за чие воспоставување разговаравме за време на нашите претходни контакти, рече рускиот претседател.
