Поранешниот претседател на САД, Доналд Трамп објави дека ќе отвори своја социјална мрежа наречена „Труф Соушл“ (Truth Social), откако во јануари беше исклучен од Твитер, Фејсбук и од Јутјуб. Од платформите од кои беше исклучен, го обвинија за поттикнување на поддржувачи на насилство пред нападот на Конгресот.
– Јас ги формирав „Труф Соушл“ и групата за медиуми и технологија на Трамп (ТМТГ) за да се спротивставам на тиранијата на технолошките гиганти – рече Трамп во изјавата, прецизирајќи дека неговата платформа ќе биде лансирана во првиот квартал од 2022 година.
Тој нагласи дека големите компании во Силиконската долина ја искористиле својата еднострана моќ за да ги замолчат гласовите на несогласување во Америка.
Републиканскиот милијардер беше исклучен од Фејсбук, Твитер и Јутјуб по нападот врз американскиот Конгрес на 6 јануари, што го извршија неговите поддржувачи за време на церемонијата на потврдување на победата на Џозеф Бајден на претседателските избори.
Пред да биде исклучен, Трамп имаше речиси 89 милиони следбеници на Твитер, кога објави голем број претседателски одлуки, имаше 35 милиони следбеници на Фејсбук и 24 милиони на Инстаграм.
Платформата „Труф Соушл“ ќе биде достапна во бета верзија на повик од ноември 2021 година, се наведува во соопштението, додека новата медиумска групација на Трамп ТМТГ ќе има и видео сервис на барање со забавни програми и подкасти.
