Талибанците ја преземаа одговорноста за нападот врз резиденцијата на авганистанскиот министер за одбрана, Бизмилах Кан Мохамади во Кабул. Во нападот загинаа осум лица, а повеќе од 10 беа повредени.

Портпаролот на талибанците, Забиула Муџахид изјави дека цел на оваа организација била резиденцијата на министерот, каде што, како што рече, се одржувал важен состанок, пренесува „Ројтерс“.

Полицијата претходно соопшти дека авганистанскиот министер не бил дома кога бил активиран автомобил-бомба и било пукано во близина на неговата резиденција во утврдената Зелена зона во Кабул.

Неговото семејство било безбедно евакуирано, додека четворица напаѓачи се меѓу осумте жртви во судирот што следеше потоа.

Во друга експлозија недалеку од објектот на авганистанската безбедносна агенција во главниот град Кабул, денеска беа ранети двајца цивили и еден службеник во обезбедувањето.

Нападите се случуваат во време на борби меѓу владините сили и талибанците во повеќето авганистански градови, а Советот за безбедност бара итен прекин на насилствата, откако ОН соопштија дека најмалку 40 цивили се убиени во провинцијата Лашкар Гах во претходните 24 часа.