Пред 25 години, шестгодишното момче за кое се веруваше дека е реинкарнација на Панчен лама (втор по ранг веднаш зад Далај лама во верувањето на тибетскиот будизам) исчезна без трага, пренесува Си-ен-ен.
Гедун Чоки Нима оттогаш не е виден, ниту за него се слушнало, се до вторникот, кога се појавија информации за него во Кина. Тој, наводно, води нормален живот, има 31 година, дипломирал и има работа, а неговото семејство не сака да биде вознемирено и вмешано во несогласувањата помеѓу Кина и Тибет.
Ваквата информација била споделена од портпаролот на на кинеското Министерство за надворешни работи, Жао Лијан, за време на редовниот брифинг за новинарите.
Гедун Чоки Нима бил идентификуван од страна на Далај лама, тибетскиот духовен лидер, како 11-ти Панчен лама во 1995 година, шест години по смртта на неговиот претходник. Но, Пекинг го одбил и брзо понудил свој кандидат, Гјалцен Норбу, за кој тие тврдат дека е вистинскиот Панчен лама.
Со тоа, Кина избегна тој да биде нивен противник, обликуван и израснат од Далај лама, кој пребегна од Тибет во 1959 година и живее во егзил, а редовно е обвинуван за сите немири во Тибет. Откако стана возрасен, Норбу зазеде улога на јавно лице и придружник на највисокото кинеско политичко тело и честопати се појавува на важни настани во Пекинг.
Останува непознато дали Нима знае или е свесен за тоа оти бил избран за Панчен лама. Во изјавата по повод 25-годишнината од неговото исчезнување, тибетската влада во егзил изјави дека „киднапирањето од страна на Кина на Панчен лама и присилно негирање на неговиот верски идентитет и негирање на правото на практикува служба во неговиот манастир не само што е повреда на верската слобода, туку е и кршење на човековите права“.
Американскиот секретар Мајк Помпео исто така побара од Пекинг да открие каде се наоѓа вистинскиот Панчен Лама и да ги почитува тибетските трацидии и верски слободи.
Најважната цел на Панчен Лама од перспектива на Пекинг е улогата што тој традиционално ја има во идентификување на реинкарнацијата на Далај лама, кој се почитува како жив бог од страна на тибетанските будисти. Со досегашниот носител на таа титула, Тенцин Ѓацо, кој е 14-тиот Далај лама и има 84 години, постои голема шанса да биде потребно избирање на наследник во скоро време. Пекинг со години покажува дека сака да ги стави под контрола овие религиски лица.
– Реинкарнацијата на живиот Буда, вклучувајќи го и Далај лама, мора да ги почитува кинеските закони и регулативи и да ги следи верските ритуали и историските конвенции – изјави претставник на официјално-атеистичката Кина минатата година, кога Далај лама беше хоспитализиран со инфекција на белите дробови.
Во законот донесен во 2007 година се вели дека реинкарнацијата на живиот Буда е „предмет на постапка за одобрување“.
Далај лама изјави дека неговиот наследник е можно да биде некаде надвор од Тибет, или дека тој воопшто нема да се реинкарнира, со што е последната личност која ја има таа титула во моментов.
Во 2011 година, Далај лама го осуди обидот на кинеската влада да се замеша, велејќи дека „лицето кое се реинкарнира има единствен легитимен авторитет за тоа каде и како тој или таа се раѓа повторно, и како ќе се признае таа реинкарнација“.
– Никој не може да го присили или манипулира засегнатото лице. Тоа е особено несоодветно за кинеските комунисти, кои експлицитно ја отфрлаат идејата за минати и идни животи, а камоли концептот за реинкарнации, да се мешаат во реинкарнациите на Далај и Панчен Лама – изјави Далај лама.
