Официјален Пентагон соопшти дека објектите ги користеле фракции на ирански поддржаните милиции, вклучувајќи ги Катаиб Хезболах и Катаиб Саид ал Шухада. Сириската опсерваторија за човекови права, која е британска група што одблизу го следи сирискиот конфликт преку активисти на терен, пренесе дека најмалку пет припадници на ирачките милиции загинале во воздушните напади. Американските воени претставници сè повеќе добиваа предупредувања за напади со дронови, чија цел биле американските воени бази во Ирак, кои зачестија откако во напад со американски дрон беше убиен иранскиот генерал Касим Сулејмани во близината на аеродромот во Багдад лани. Нападите во неделата се втора акција на администрацијата на Бајден во регионот. Во февруари, САД извршија воздушни напади врз објекти во Сирија во близината на границата со Ирак, за кои се сметаше дека ги користеле ирански поддржаните милициски групи. Пентагон порача дека тие напади биле возвратен удар на ракетниот напад во Ирак во февруари, кога загина еден цивилен соработник, беше ранет еден припадник на американската војска, како и други војници од коалициските сили.
